A Asociación Galega de Profesionais da Xestión Cultural (AGPXC) impulsa o proxecto Coidar de Nós, para coidar da cultura coa intención de abordar a sustentabilidade e as condicións laborais das persoas que traballan na xestión cultural.

Unha reflexión colectiva, que deseñamos e coordinamos desde o inicio, que busca avanzar cara a modelos de traballo máis sustentables, desde o recoñecemento profesional ata a saúde e o benestar das persoas que sosteñen a actividade cultural nos seus territorios.

Dirixido a…

📌 Profesionais da xestión cultural, tanto do ámbito público como privado.
📌 Persoas autónomas, cooperativas ou integradas en pequenas entidades culturais.
📌 Estudantes e persoas en proceso de incorporación ao sector cultural.
📌 Entidades públicas e axentes interesados en mellorar as condicións laborais no sector.

O que fixemos

📌 Deseño e coordinación técnica do proxecto e das actividades desde o seu inicio.
📌 Comisariado e coordinación de encontros profesionais.
📌 Desenvolvemento de contidos divulgativos e formativos.
📌 Xestión de espazo web e documentación de resultados.
📌 Facilitación de procesos participativos e metodoloxías colaborativas.

O enfoque

Coidar de Nós, para coidar da cultura nace, sen sabelo, nun deses encontros nos que a invitación partía de compartir “boas prácticas” na nosa profesión. Aquelas nas que adoitamos reflexionar sobre como facer mellor o noso traballo, como deseñar proxectos máis impactantes, como chegar a máis públicos ou como acadar un maior recoñecemento social. Porén, aquel día, xurdiron outras preguntas, tan necesarias como pouco habituais: existen condicións sostibles para facer o noso traballo? Podemos xerar colectivamente mellores condicións para todas e todos nós? Como estamos realmente?

Fronte á normalización do malestar, propuxemos parar, compartir e pensar colectivamente. Porque se un sistema precisa queimar a quen o sostén, hai algo que debemos revisar. E facelo non só desde a queixa, senón tamén desde a procura de ferramentas, referentes e solucións prácticas.

O tempo, a saúde e a sostibilidade convertéronse así nas chaves para repensar os ritmos e dinámicas do noso sector, tanto desde o público como desde o privado. Para poder coidar da cultura, cómpre —polo menos— comezar por coidarnos entre nós.

O equipo

Sergio Lago – Deseño, coordinación e elaboración de contidos
Ruth Sousa – Apoio técnico e revisión de contidos

Colaboramos con:

Adriana Castro Tarela e Mon Rivas (AGPXC) – Produción e xestión de eventos
Arancha Estévez – Comunicación
Triwus – Deseño gráfico e web (2022–23)
Coma – Imaxe gráfica (2024)
Pablo Chouza – Fotografías dos encontros presenciais