Presentación no Museo Provincial de Pontevedra do proxecto Saberes Próximos. De pé, diante dun gran número de persoas tamén de pé, Sara Fraga explica os detalles do proxecto

Levamos os nosos Saberes Próximos ás Xornadas de Museos e Educación Patrimonial

O Museo Provincial de Pontevedra acolle estes días a segunda edición das Xornadas de Museos e Educación Patrimonial, que se celebran baixo o lema Construíndo futuros dende a educación.

Estas xornadas teñen como obxectivo conectar a persoas vinculadas á educación en museos e universidades de Galicia, España e Portugal. E xiran arredor de tres eixos:

  • Educación patrimonial para o cambio social
  • Novos formatos e medios 
  • Creación de redes de colaboración institucionais

 

Neste marco, no que participaron diversos proxectos, presentamos Saberes Próximos.

Saberes Próximos e o noso patrimonio inmaterial

Saberes Próximos é unha proposta vinculada á nosa liña de traballo de investigación e divulgación. Nela quixemos coñecer ás persoas que recollen, coidan a difunden o noso patrimonio inmaterial. E xerar unha narrativa dixital coa que  visibilizalas e poñer en valor a súa labor.

Fixémolo co apoio de Cultura da Deputación da Coruña, a través do seu programa de proxectos singulares de especial interese cultural

A nosa compañeira Sara Fraga, comisaria do proxecto, foi a encargada de desenvolver a presentación na sesión de pósteres da xornada e explicar as claves deste proxecto.

Un momento da presentación de Sara Fraga do proxecto Saberes Próximos. Ela está de pé, intervindo cun micro na man, mentres un grupo de persoas a escoita e outros gravan a intervención no móbil.

Patrimonio inmaterial e formatos dixitais

O proceso de recollida de información de Saberes Próximos materializouse na web saberesproximos.gal, que ofrece diferentes posibilidades de lectura.

Por unha banda, a rede interactiva, que permite xogar coas persoas e colectivos que a forman. Por outro, un mapa xeolocalizado. E tamén unha lista que permite unha navegación máis sinxela.

Pero, ademais, do contacto coas persoas que traballaban co patrimonio inmaterial xurdiu a ocasión de falar devagar e de profundar nalgunhas cuestións.

Desa oportunidade xurdiron As Conversas, un formato sonoro artellado en cinco episodios cos que coñecer en detalle o traballo e as motivacións doutras tantas persoas vinculas ao noso patrimonio inmaterial.

Subir