Onte estreamos Artesanías Dixitais, un webdoc que propón un percorrido polo espazo dixital galego da man de doce creadoras e creadores procedentes de áreas moi diversas: programación creativa, docencia, recreación histórica, deseño, arte, videoxogos…
Este proxecto ten como obxectivo ofrecer unha panorámica sobre as profesións ou áreas de traballo emerxentes vinculadas á creación dixital e que teñen un vínculo real con profesionais, empresas e itinerarios educativos de Galicia.
Estas disciplinas, aínda que non o pareza, teñen moito en común coas vellas artesanías! Os seus profesionais traballan coas mans, o seu oficio require coñecemento amplo da técnica e das ferramentas, e é froito de anos de experiencia, e ademais desenvolven novos saberes. Eles e elas constrúen a nosa cultura dixital.
Que podes ver no webdoc?
Artesanías Dixitais recolle, a través dunha narrativa dixital como a do webdoc, o testemuño de:
- Marta Verde, programación creativa.
- Brais Moure, programación de apps.
- Santi Villamarín, deseño IX/UX.
- Rocío Pomar, educación +360.
- Xacobo de Toro, educación +AR.
- Marina Núñez , arte digital
- Cristal Reza, ilustración dixital.
- Marcos Barrios, video-mapping.
- María Fernández, videoxogos.
- Anxo Miján, recreación histórica 3D.
- Alex González, fotogrametría.
- Carlos Paz, recreación histórica 3D.
Artesanías Dixitais foi deseñado e realizado polo noso compañeiro Antón Varela, creador audiovisual e dixital emerxente recentemente premiado nos festivais Carballo Interplay e @Youtubeir@s , a quen coñecimos grazas ao seu traballo en Vinte.
Onde podes velo?
Artesanías Dixitais realizouse ao abeiro do Fondo de proxectos culturais Xacobeo 2021, impulsado dende a Secretaría Xeral de Política Lingüística.
En Vinte fixeron unha magnífica reportaxe sobre o webdoc e os seus contidos, que te convidamos a ler. Tamén podes ler sobre Artesanías Dixitais no xornal Praza unha completa reportaxe! Así como no dixital Galicia Confidencial, no que tamén se fixeron eco do proxecto.
Podes navegar o noso documental interactivo en artesaniasdixitais.bencuriosa.gal. Agardamos que che guste!
Outras novas destacadas
As Estratexias da Museoloxía Social, adicadas este 2024 a investigar e aprender no museo con outro tempo
A Cultura é un dereito: Acción e políticas culturais municipais
A Rede Museística de Lugo abre a súa comunidade de aprendizaxe á sustentabilidade e o benestar
Políticas e dereitos culturais no centro da conversa
Coñecemos coa Fundación Uxío Novoneyra e o CEU en Xestión e Innovación Cultural a paisaxe e a cultura do Courel
