Somos

Un equipo de profesionais ao servizo do coñecemento e da creatividade en común.

Desde BenCuriosa queremos contribuír á renovación do ecosistema cultural, impulsando procesos de xeración e intercambio de coñecemento e deseñando solucións novidosas para estimular o desenvolvemento creativo de organizacións, comunidades e territorios.

Partimos dunha noción de cultura aberta (inclusiva, exploradora, dinámica) que aposta pola implicación cidadá e a finalidade social dos proxectos, pola cooperación entre axentes culturais e creativos, polo vínculo co tecido empresarial e pola conexión coa esfera internacional, desde unha forte ancoraxe na nosa identidade.

 

O equipo

Marcos Lorenzo

Economista e antropólogo, realizou estudos complementarios en xestión cultural, urbanismo e cooperación internacional. Ao longo da súa traxectoria profesional foi responsable da política cultural do Concello de Ferrol, director da empresa de xestión cultural e-Burbulla S.A., xerente da Asociación de Actores, Directores e Técnicos de Escena de Galicia, coordinador de proxectos europeos na Fundación Galicia Emigración e fundador da empresa social Cidadania S. Coop. Galega.

Asesor da Cidade da Cultura de Galicia, onde recentemente dirixiu o I Encontro Internacional de Economía e Cultura, así como, entre outras actividades, o ciclo de cultura contemporánea NEXOS. Autor de diversas investigacións e ensaios, imparte docencia en materias relacionadas coa xestión de proxectos, a creatividade e o desenvolvemento territorial.

// Twitter @culturatleta // Linkedin // Blog persoal

 

Sergio Lago

Formado en Gráfica Publicitaria, dende 2003 ven participando na creación e dirección de proxectos no ámbito cultural galego. Ten traballado tamén en iniciativas do eido TIC, especialmente na implantación de estratexias dixitais, na creación e deseño de contidos web e no lanzamento de iniciativas de comercio electrónico.

En 2011 foi escollido como director de Culturgal, a Feira Galega das Industrias Culturais, desenvolvendo xunto ao equipo de nócomún e ata maio de 2013, o proceso de reformulación estratéxica do modelo de feira, así como a organización integral do evento anual. Entre 2013 e 2015 asumiu a coordinación técnica e a xestión de contidos na Asociación Galega de Profesionais da Xestión Cultural.

// Twitter @sergio_lago // Linkedin // Blog persoal