programacións

“O trazo desatado”: a ollada de Nexos á banda deseñada e á animación galegas

05/02/2018

Despois dunha primeira sesión, A quimera da conciliación, no pasado mes de xaneiro, o ciclo Nexos, que coordina o noso compañeiro Marcos Lorenzo, regresa á Cidade da Cultura (sábado 24 de febreiro, 12:00) cun tema totalmente distinto baixo o título O trazo desatado.

Na sesión deste mes de febreiro falarase da potencia creativa que é Galicia nos mundos do cómic e da animación, con autores e obras premiados a nivel estatal e internacional, analizando as claves históricas que explican esta incrible concentración de talento, pero tamén a outra cara da moeda: un tecido empresarial neste ámbito feble, aínda por consolidar.

Nesta ocasión, os relatores serán Alberto Vázquez, director de cine e ilustrador con máis dun cento de premios, entre os que se inclúen tres Goyas de animación, e Manel Cráneo, artista multidisciplinar e debuxante, director de Demo Editorial e expresidente da AGPI (Asociación Galega de Profesionais da Ilustración). No apartado artístico , a proposta de Nexos é un “combate de debuxantes”, conducido e animado por Dani Xove, no que participarán catro novos valores da banda deseñada: Inés Casarejos, Guille Debelius, Xulia Pisón e Luis Yang.

A sesión rematará ás 14 h. cun convite a un viño e un petisco por cortesía de Bodegas Martín Códax e Conservas Antonio Pérez Lafuente. Como sempre, hai un NEXOS INFANTIL paralelo ao dos adultos, con actividades para as nenas e nenos relacionadas coa temática da sesión.

Toda a información sobre “O trazo desatado” así como a adquisición das entradas podédela atopar aquí.

 

Outras publicacións do proxecto