programacións

“A quimera da conciliación” abre unha nova edición de Nexos na Cidade da Cultura

03/01/2018

A Cidade da Cultura acolle un ano máis (e xa van seis) o ciclo de cultura contemporánea Nexos, dirixido por Marcos Lorenzo, con cinco sesións nas que, como xa é habitual, se combinan relatorios nun ambiente distendido con propostas artísticas creadas expresamente para a ocasión. O próximo 27 de xaneiro terá lugar a primeira das sesións programadas para este 2018, cun relatorio a cargo de Carolina del Olmo, filósofa e xestora cultural, autora do libro ¿Dónde está mi tribu? Maternidad y crianza en una sociedad individualista, quen abordará as dificultades da crianza na sociedade actual baixo o título “A quimera da conciliación. Crianza, coidados e traballo doméstico no S. XXI”.

Nesta sesión analizaremos as contradicións da nosa sociedade desde a perspectiva da maternidade e os coidados e se as políticas de conciliación enfrontan ou non as causas estruturais da actual crise demográfica. Trala charla e posterior conversa, a escola de teatro compostelá Espazo Aberto ofrecerá unha metáfora escénica, creada para Nexos, sobre o transcorrer do tempo na vida laboral dunha persoa, coas actuacións de Alicia Casas, Roi Fernández, Borja Limeres, Paula López, Yolanda Martínez e Alejandra Tomé.

Arte galega e Nexos Infantil

Nesta edición de Nexos falarase da explosión creativa na banda deseñada e animación en Galicia, do noso patrimonio cultural, da actualidade do mundo árabe e musulmán  e da renovación e florecemento nas pasadas décadas da música popular portuguesa. Mesturando os relatorios con arte galega e producións creadas en exclusiva para o ciclo. Así, nesta edición haberá, ademais da performance de Espazo Aberto, un “combate de debuxantes” , un monólogo cómico de Carlos Meixide, un espectáculo sonoro e visual de Nenoescuro e unha actuación sorpresa. E coma sempre tamén, nesta edición hai sitio para os máis pequenos en  Nexos Infantil , para nenos e nenas de 5 a 12 anos de idade.

As cinco sesións celebraranse  na Biblioteca e Arquivo de Galicia coa novidade este ano do pago por asistencia: 3 euros para os relatorios e 2 euros para as actividades coa cativada, cunha promoción especial para as persoas que adquiran as tres primeiras sesións, que terán de balde as dúas seguintes.

Pódese conseguir a entrada e ter máis información polo miúdo na web da Cidade da Cultura.

Outras publicacións do proxecto