Laboratorios itinerantes

Despois de varias semanas intensas, de aprender e experimentar xuntas, os Laboratorios Itinerantes de Cultura Dixital pecharon as súas portas virtuais. Foi un tempo intenso, no que moitas persoas descubriron novas maneiras de comunicar e de compartir na Rede e no que outras se achegaron por primeira vez á contorna dixital dende unha perspectiva creativa. Sen esquecer a aquelas que tiveron nos nosos obradoiros a súa primeira experiencia dixital!

A proposta de Illa Bufarda nos Laboratorios Itinerantes de Cultura Dixital non deixaba lugar a dúbidas: chamaba a unha “acción de guerrilla” creando unha contracampaña publicitaria. Unha dinámica que consiste en entender como se nos fala dende ámbitos como a publicidade ou os medios de comunicación global e que elementos compoñen o discurso dominante para levalos ao noso terreo e xogar con eles.

En BenCuriosa levamos tempo traballando nas posibilidades da cultura dixital e da mediación cultural a través da Rede dende varias perspectivas. Unha delas, a da creatividade dixital, a través de proxectos divulgativos ou formativos que, grazas ao apoio da Deputación da Coruña, e o seu programa de proxectos singulares de especial interese cultural, se materializan agora nun novo proxecto: os Laboratorios Itinerantes de Cultura Dixital.