Cultura Dixital

As posibilidades creativas da tecnoloxía protagonizan a nova convocatoria das Xornadas sobre Mediación Cultural do CCG

11/11/2019

As Xornadas sobre Mediación Cultural que promove no Consello da Cultura Galega o noso compañeiro Marcos Lorenzo celebrarán o vindeiro 3 de decembro unha nova sesión. Tras unha primeira achega a pasada primavera á animación sociocultural e á cultura colaborativa, nesta nova convocatoria o ciclo aposta por unha aproximación á cultura dixital.

Esta segunda sesión, que leva por título Contidos e prácticas culturais e artísticas na contorna dixital, está tamén coordinada polo noso compañeiro Sergio Lago, e supón unha toma de contacto con algunhas das novas tendencias, estratexias e ferramentas coas que o público está aproximándose aos contidos culturais e artísticos no ámbito dixital.

 

Novos formatos  e ferramentas inmersivas 

Nun primeiro bloque, a sesión abordará as prácticas artísticas e culturais que experimentan coa mediación tecnolóxica, desde a perspectiva das novas posibilidades que se presentan, pero tamén desde una posición crítica.

Para iso contará coa participación do produtor cultural Bani Brusadin, comisario do festival The Influencers, que vén de celebrarse no CCCB de Barcelona, ou dos estudios críticos Freeport 0 do festival Tentacular, dúas referencia dos espazos de intersección entre a arte, a tecnoloxía e as novas culturas populares dixitais. Por outra banda, a xornalista Esther Pérez-Amat, integrante do Laboratorio de Innovación de RTVE, aportará neste bloque a súa experiencia no eido na narrativa dixital inmersiva nas artes escénicas e musicais. Faráo ademais desde unha perspectiva práctica,  explicando as necesidades de desenvolvemento dun proxecto destas características

Experiencias galegas que destacan polo seu bo facer

O segundo bloque da xornada estará adicado a boas prácticas galegas de educación e divulgación cultural no eido dixital. Así, coñeceremos as estratexias para a alfabetización dixital e mediática de adultos, da man de Carmen Suárez Nieto, impulsora da iniciativa Fálame de San Sadurniño, as claves da divulgación cultural nas redes con Miguel Ángel Cajigal Vera El Barroquista, e a filosofía coa que se desenvolve Coruña Dixital, un programa municipal integral de educación e divulgación dixital co seu coordinador, Sergio Lago.

 

A asistencia a esta xornada é gratuíta, pero as prazas son limitadas. Tedes a infomación ampliada e o formulario de inscrición na web do Consello da Cultura Galega, á que podedes acceder xa desde aquí.